Ek Din Achanak Part 14

Idhar sab bhulakar Jay aur Sonali masti mein choor the. Mobile mein gaane special bharaye the holi wale Jawed Bhai ne. Bas wohi baj rahe the aur sab uski awaaz ke saath jhoom rahe the lekin Jay aur Sonali ko hosh nahin tha ki aane wala samay dono ki kismat kahan le jaane wali thi.

Raj chal to diya Sonali ke ghar lekin use baar baar Sonali ki mummy ka thappad yaad aa raha tha.Wo dua kar raha tha ki aaj uncle ghar par mil jayen kyunki aunty to uski baat sunengi nahin isliye uncle se hi baat karna behtar hoga. Aisa sochte sochte Raj Sonali ke ghar pahunch gaya. Wahan bhi holi se rang mein sab sarobar the. Raj ne pehle to wapas jaane ki sochi lekin fir himmat karke ghar mein chala hi gaya.

Andar aunty ne jaise hi Raj ko dekha to gusse mein aa gayi lekin uncle ki wajah se kuch nahin boli. Uncle ne Raj ko dekhte hi kaha “Beta kaise ho. Aajkal aate hi nahin ho. Aur aaj school ki jaldi chutti ho gayi kya”.

 “Ji Uncle aaj holi ki wajah se school mein jaldi chutti ho gayi hai. Main achha hun. Aap bataiye.”

 “Aur Beta tum sunao ghar par kaise hain. Sinha sahib (Raj ke daddy) kaise hain”

 “Uncle papa theek hain. Main aapse ek jaroori baat karna chahta tha” Itne mein Sonali ki mummy kamre mein bahar drawing room mein aa gayi jinhe dekhkar Raj chup ho gaya kyunki yahi baat karne ki wajah se wo thappad kha chukka tha. Aunty ne use gusse mein dekha to wo kuch bol hi nahin paaya.

 “Raj beta kaho kya baat karna chahte ho”.

“Uncle darasal baat … “ Itna kehkar Raj ne fir aunty ki taraf dekha to use aunty gusse mein ishare se mana karti huyi dikhi. Raj ne kaha “Uncle main soch raha tha ki paper agle hafte se shuru hone wale hain aur uske baad chuttiyan pad jayengi. Main Computer class join kar raha hun in chuttiyon mein. Aap bhi Sonali ko join karwa dijiye”. Aisa bolkar Raj ne ek baar fir aunty ki taraf dekha to use laga ki aunty ko bahut sukun mila ho uski baat sunkar.

 “Are ye to badi achhi baat hai. Ismein itna jhijhak kyun rahe the”.

 “Main soch raha tha uncle kahin aap mana na kar do”

 “Are nahin beta. Tum ek bahut achhe ladke ho aur Sonali ke liye tumne bahut badhiya socha. Main khud aisa hi kuch soch raha tha. Chalo achha hua ki tum aur Sonali ek saath class mein jayoge”.

Raj ye sunkar bahut khus ho gaya. Kahan to usne socha tha ki uncle ko jay ke khilaf bhadka dega ur uncle khud dono ko alag kar denge. Lekin ab uncle uski itni tareef kar rahe hain to kuch aisa karna chahiye ki saanp bhi mar jaaye aur lathi bhi na tute matlab Jay aur Sonali dono alag bhi ho jayen aur mera naam bhi beech mein na aaye.

Iske baad Raj ne kaha “Uncle ab main chalta hoon. Papa ne kisi kaam se bheja tha. Bas wohi karne jaa raha hoon. “

Raj ke jaane ke baad uncle ne kaha “Kitna shareef ladka hai. Kaise achhe sanskar hain iske. School se aaya aur turant apne papa ke kaam mein lag gaya”

Aunty ne muh banaya aur kaha “Haan bahut achha ladka hai.” Ab wo bolti bhi to kya bolti.

Ab Raj ki khushi ka thikana nahi tha aur wo apni chaal ko kamyab karne ke liye yojna banane mein lag gaya tha. Idhar Holi aur Jay ke pyaar ke rang se sarobar Sonali apne ghar pahunchi to uski mummy ne pucha “beti ye kya halat bana li hai tumne. Itna rang laga liya chehre aur baalon mein kahin koi nuksaan na pahuncha de. Dress bhi colour mein kar li. Ab school kya pehan kar jaogi.”

Sonali ne kaha “mummy mere paas aur bhi do dress hain. Aur rahi colour ki baat to ye sab herbal colour hain. Inse koi nuksaan nahin hoga. Papa kahan gaye”

 Aunty ne kaha “Beti wo apne doston ke saath jara bahar gaye hain.

Aaj Raj aaya tha wo jo tere saath hi class mein padhta hai.”

 “Wo yahan kyun aaya tha. Lagta hai school mein use maar kam padi hai jo pitne yahan bhi aa gaya.”

 “Kya usko school mein peeta gaya tha. Lekin kyun.”

Tab Sonali ne saari baat batayi ki kaise Raj Sonali ko tang kar raha tha, kaise behuda shabd istemal kar raha tha aur kaise sabne milkar uski marammat ki thi. Aunty ye sab sunkar chaunk gayi aur unhone Raj aur uske papa ke baach huyi saari baat bata di.

Sonali samajh gayi ki Raj yahan kyun aaya tha. Lekin use ye samajh mein nahin aa raha tha ki usne papa ko sab kuch kyun nahin bataya. Kya game khel raha hai wo. Sonali ye sab soch hi rahi thi ki achanak aunty ke sawal se chaunk gayi.

Aunty ne poocha “Ye Jay kaun hai. Aur tumhara usse kya lena dena hai.”

Sonali samajh gayi ki Raj ne shayad mummy ko sab bata diya hai aur ab inse jhoot bolna theek nahin. Isliye usne bataya ki “Mummy main aur Jay ek doosre se pyaar karte hain.”

Aunty ne ek jor ka thappad Sonali ke muh par maara aur kaha “To Raj theek hi keh raha tha. Maine bina soche samjhe use maar kar bhaga diya. Tum par andhvishwaas jo tha. Tume hamein dhoke mein rakha. Kaun hai ye Jay. Kahan rehta hai kya karta hai, khandaan kaisa hai kuch jaanti bhi ho uske baare mein.

 “Pyaar kis chidiya ka naam hai pata bhi hai tumhe. Tum jaise ladke ladkiyan aisi umar mein aksar bahak jaate hain. Isliye aaj hi main tere papa se baat karungi is baare mein.”

 “Sonali ke paanv ke neeche se to jaise jameen hi nikal gayi. Wo bahut royi aur gidgidayi apni hi mummy ke saamne ki please mujhe maaf kar do. Papa ko kuch mat batana. Hum dono ne koi paap nahin kiya hai. Hamara rishta ek dam pavitra hai. Us Raj ne aakar apko mere khilaf bhadkaya hai.”

Lekin Sonali ki mummy kuch sunna nahin chahti thi. Wo bus wahan se apne kamre mein chali gayi. Sonali ki to jaise duniya hi ujad gayi thi. Wo apne bed par aakar let gayi aur uski aankhon se aansun ka sailab umadne laga. Ye sab kya ho gaya achanak. Papa ko pata chalega to wo mujhe maar hi dalenge. Maine pyaar hi kyun kiya.

Meri wajah se Jay par koi aanch na aa jaye. Ye Raj mujhe kahin mil jaye jinda nahin chodungi ise.

Aise pata nahin kitne khyaal Sonali ke dimaag mein chal rahe the aur dil sham ko hone wali ghatna ke dar se ghabra raha tha. Aansu thamne ka naam hi nahin le rahe the. Ab kya hoga ?

Idhar jay bhi apne ghar pahuncha to uske papa usko dekh kar aag baboola ho gaye kaaran uski dress ka kharab hona tha lekin Holi ke paawan avsar par wo us par haath uthana nahin chahte the isliyeg usse ko pi kar bole “Bete tumhe to pata hi hai na hamare ghar ki maali halat. Fir tumne aisa kyun kiya.”

 “Maine kya kiya hai papa”.

 “To ye dress maine kharab ki hai kya”. Saara saara din majduri karo tumhare liye aur tum ho sab mitti mein mila rahe ho. Ab nayi dress kharidne ke paise kahan se aayenge.” Jay chaunk gaya. Usne to ye socha bhi nahin tha holi ki masti main ki aisi naubat hi aayegi saamne. Ab kehte hain na ki Jab bachha khud apna kharcha uthana seekhtha hai tab hi use cheez ki keemat samajh mein aati hai lekin tab tak baap kahin se bhi paise laye use koi matlab nahin.

Jay ki aankhon mein aansu aa gaye lekin usne kaha ki “Papa merep aas ek purani dress hai. Thodi purani hai lekin kaam chal jayega”. Jay ke papa ki aankhon mein aansu aa gaye aur apne bête ko gale laga kar bole “nahin beta tum wo kyun pehnoge. Tumhara baapa bhi jinda hai. Kal hi tumhare liye nayi dress aa jayegi”. Jay ye sunkar apne papa ke gale se lag gaya. Iske baad usi rangeen dress mein usne apne gahrwalon ke saath jabardast holi manayi is bat se bekhabar ki is samay Sonali par kya beet rahi hai aur kal ka suraj dono ke liye kitni mushkilen khada karne wala hai.

To be continued....